Toe ek vandag aftrek by so ʼn mooi uitspanplek op die Sabie rivier waar ʼn mens jou ontbytkos kan uithaal of gaarmaak sien ek hom. Hy sit op ʼn dwars stomp met sy voete wat afhang tot op die grond met sy elmboë op sy knieë , kompleet soos my Oupa Koos altyd op die lae bankie voor die agterdeur gesit het. Ek stap nader maar hy gee nie eintlik pad nie en die volgende oomblik praat hy met my in geen onsekere taal : hierrond is ek die baas.

Ek sien maar hy het nog ʼn paar ander jonger trawante wat ook daar rondhang. Hulle hoofdoel is om die toeriste se kos te steel. Alles is mooi uitgewerk deur Kees,die leier. As daar ʼn kar stop hou hy die mense fyn dop. Sodra hulle die kos uithaal hardloop hy met spoed en ʼn moerse gebrul en oopbek op hulle af . Die mense skrik hulle boeglam en dan gryp Kees hulle kos.

Ek praat met Siabonga Khoza , die skoonmaker , wat al 11 jaar daar werk. Hy sê daai bobbejaan lol nie te veel met die boere nie want hulle skrik nie sommer vir ʼn bobbejaan nie maar target die toeriste, veral die Japannese en Italianers. Hy luister glo eers fyn watter taal hulle praat ! Hy sê ʼn Portugees het eendag vir hom gevra of hulle die bobbejane leer om te steel !

Hy vertel eendag sit daar ʼn paar boere en hulle braai sulke dik boereworse . So entjie daarvandaan sit Japannese toeriste en verwonder hul aan die besigheid. Hulle roep toe vir Siabonga nader en wil weet of dit ʼn slang is wat die mense braai ! Hy het toe vir hulle ʼn stukkie slang gaan bedel om te kan proe.

Hy en een van die ander werkers sit eendag aan die bokant van die terras en net onderkant hulle aan die rivier se kant , sit ʼn Japannese familie rustig en eet. Hulle sien ʼn beweging by die reëling net langs die Japannese en skrik groot toe hy sien dis ʼn ou leeuwyfie wat stip na die mense staar , sommer hier by hulle ! Bongani sê hy skrik so groot dat hy nie kan Engels praat nie en skree toe in Swazi : "Balêka ! , wat hardloop beteken maar die Japannese verstaan toe blykbaar die taal! Hulle harloop en spring oor ʼn 4 meter hoë terras soos wafferse atlete. Die ou Japannees wat die hoof van die familie is hardloop na die kar, laat die sluitels tweekeer val met die oopsluit en jaag weg. Tien minute later is hy weer terug om die res van sy familie op te laai. Hy sê maar toe skel daai Japannese antie die oom dat selfs hy wat Siabonga is Japannees verstaan !

Ja die Wildtuin is nie so rustig soos dit lyk nie .